Nua oamoi nu...

Nua oamoi nu mechat i des Gfüh zruck, so wia fria, wia i kloa woa.

Wånn Weihnåchtn kema is, mei, wia woa des schee!

So a Gfüh håb i nimma ghåbt, scho so lång nimma!

Des woa so einwendi und tiaf wia a See.

Heit gibts des goa nimma, weu wåma groß is, is`s oafåch weg,

oafåch vaschwundn.

Dåmois håt ma jedn Tåg im Adpfent gwoat, mit so oana Freid,

de kå ma goa ned beschreibn!

Mit so oana Hoffnung, wiasa`s heit koana mea kennt.

Wånn am Krånz die Kerzn brennt håm, ålle Wochan oane mehra,

dånn håt ma`s gwisst, boid is`s soweit!

Die ållerscheenste Zeit is kemma!

Und heit?

Ois is weg, ois dahi, so schåd, so schåd!

Wo is`s nua bliebn?

Gånz weng nu, nua a Futzal vo Åhnung, wia`s fria amoi woar,

des find i nu in mia.

Oba iagendwo muasss do hi sei, des Gfüh? Des kå do ned weg sei,

håts wea gsegn oda goa troffn?

Vialleicht find`s jå wer und gibt ma`s goa zruck, mei, warat des schee,

mei warat des schee!

Ein paar Mundart Gedanken, nicht ganz, wie`s gehört,

einfach so wie ich es empfinde